|
Am Sechzehnta Juni henn mr von dr Äfflesgrupp (news:alt.aeffle.und.pferdle) a klois
Treffa ghett. Leidr henn a paar absaga müßa, was für mi recht schad war, weil des ja
mei erschtes Treffa war. Naja, s negscht mol halt. Den Bericht hanne scho in dr
Äfflesgrupp poschtet und weil i eigntlich faul bin, du i jetzt oifach den dohanna nomol
vrewiga. Mog sei dasse a paar Kloinigkeita ändrn dua. Bildr sinn no ganz unta. Also, i bin so kurz vor halb Zehne losgfahra und hann mr no denkt: "Manne, wenn s Wettr nur a weng bessr wärda dät." Leider hanne net recht ghett. Von dr Fahrt gibts nix bsondrs z Berichta. Nach zwei Schtund ware no in Biberach und hann au des Parkhaus von dr Schtadthalle glei gfunda. Abr do war alles voll. S nägschte, am Viehmarkt, war au voll. No hanne doch no a Parkhaus mit freie Plätz gfunda. Samschdag morgns wird abr wohl übrall fascht alles voll sei, do sinn alle Schtädt gleich. Ausm Parkhaus naus, umguckt und glei d Kirchturm gsäha. Des isch a prima Hilfe zur Orientierung. Weil den Schtadtploh den i mr vorher ausdruckt hann, war nix. Mr hat koine Schtroßanoma läsa könna. Schofscheiß. Trotzdem war des n Ohaltspunkt. Schnurstracks binne no Richtung Kirchturm dappt, weil do dr Markt mit dem Seitagäßle mit därre Beiz wo mr uns treffa wollta isch. Dr Jürgen hat au a Schild drausa noghengt. Oimol nach dr Äfflesgrupp gfrogt, no binne wiedr nausgschickt worda. Net fort, sondrn in d Biergarta. Dr Jürgen mit seiner Chrischtiane und dr Marco sinn scho doghockt. Tja, gwartet henn mr scho, dr Marco hat dbei a Seele mit Schinka und Käs gässa, abr komma isch nur no dr Räga. No henn mr halt so um Ois rum unsrn Krempl packt und sinn auf d Markt ganga. Die andra henn eikauft und i hann mr des halt alles oguckt. I sag mr halt oin Makt isch wie dr andre. S gibt andre Leit, andre Plätz und au andres Gschrei: "Jetzt hanne dir die Ärdbära für fümpf Mark gäba, und du sechsch i dät bcheißa?" hat do Oinr am Eck zur Consulentagass zu am Kunda a weng arg laut gsagt. I ko jetzt abr net saga ob des ernscht odr Schpaß war. (In Hall dät mr saga "Gäb den Korb wiedr her und gang in d Suprmarkt.") Auf dem Markt in biberach hanne no au zum erschta mol in meim Läba an lilane (I moin die Farb wie d Milkakuh) Blumakohl gsäha. Do schnallsch ab! D Chrischtiane isch no nachm Eikaufa mitm Marco zur Dollinger-Residenz glaufa und i mitm Jürgen zu meim Auto. Und noi, mir waret net faul, i hann mei Auto zum Jürgen umparkt, weil mr net gwisst henn wie lang des Parkhaus offa hat. Wär des zu gwäsa Obnds, no waär des a teiers Taxi gworda ;-) In dr Residenz okomma hat Chrischtiane an ganz leckra Kaffe gmacht, mit nr Bodum Kaffemaschie (Oinzltass) zum nuntrdrücka (I han au solche, die sinn fei gut). Abr dr Marco trinkt des scheins net und dr Jürgen hat in dr Küch gschafft. Hat mr halt nur zwei Tassa eigsaut. Dr Marco und i henn no au a weng in dr Küch mitgholfa. Dr Marco hat Zwiebla für d Kartofflsalad gschählt. Des hätt beschtimmt für an ganza Zentnr glangt. Wenn dr Jürgen net eigriffa hät, dät dr Marco immr no Zwiebla schähla ;-) Zum Ässa hats no Maultaschasupp gäbba mit sälbr gmachte Maultscha. Die warat fei gut, mit Lauch und Schpeck in dr Fülle. Des hanne au no net kennt, abr i wärd mr des märka. No wara au scho ball die Dennet fertig. Die wara mit so am schweizer Kräutrkäs und Zwieblgrün. In Biberach sagt mr glaub i Zwieblrolla dzu. Ha, des war eiwandfrei, abr leidr hanne net soviel ässa könna wie i gwellt hann. Mir ischs a weng im Ranza rumganga, abr des isch von d Zwiebla und Woiza in d letschte paar Dag komma. S isch abr au wiedr ganga. Apropoh ganga, weil mr nachm Ässa ja Tausnd Schritt dua soll, sinn mir no alle ins Schtädtle ganga. Dr Marco hat nomol zu seim Auto müßa. Des war net weit weg, nur a paar hundrt Metr. An dem Parkplatz isch no a Bächle gflossa, des war dr Ratzagraba. An dem sinn mir no langgloffa. Der isch neu Ohglegt worda, sieht schee aus. Abr no net ganz fertig. Untrwegs hanne amol Zweifl ghett, ob mei Brill no dut. Des Kino isch so blau, do kriegt mrs mit dr Angscht z dua. Gegaübr war no a Gartahäusle, des henn mr au oguckt. Des war jetzt abr net oifach nur a Gartahäusle, noi, do hat dr Christian Wieland drinn dichtet. Der hat au a paar Sacha vom Schäkspier übrsetzt, was no schpätr au uffgführt worda isch. Welches des war hann i scho wieder vrgässa. Allrdings war do nimme viel Garta ausarum, s meischte isch jetzt Schtroß. Uff jedn Fall hat do so an Fürscht odr Graf Stadion was Größrs ghett und in seim Gartahäusla hat no halt dr Wiland End vom Achtzehnte Jahrhundrt dichtet. No wollt mr um Fünfe in a Museum, abr des hat Oi Minut vorhär zugmacht ghett. Hätta mr halt net so lang an dem Brunna dvor rumgammla solla ;-) A Frau, ob die do gschafft hat, hat gmoint mir sollta halt morga nomol komma, abr des wollt koinr. Dodfür sinn mir no in a Kirch ganga. Des war die erschte wo von beide Konfessiona gnützt worda isch und wohl au no wird. Die Fußbänkla fürd Katholika konnt mr hochklappa, das d Proteschtanta meh Platz für ihr Haxe henn. Praktisch halt. A weng mulmig isch mrs gworda wo i no a Bild gmacht hann. I hann blitzt und uff oimol fängt des mit knarza, schleifa und kracha oh. Do hätte fascht wieder ofanga richtig an Gott z glauba. Abr des wara wohl nur Fenschtr wo automatisch uff und zu ganga sinn. No wars au scho wiedr Zeit dass mr langsam zrück läuft. Anr Brauerei sinn mr no vorbei komma. Nur vorbei, mir warat net drin. No henn dr Jürgen und Chrischtiane mi a Trepp nuffgjagt, i hann denkt jetzt bleibt mr ball s Herz steha. Zum Glück hanne scho jahrelang uff meim Kneipahoimwäg au so an schteila Wäg ghett, no wars doch net ganz so schlimm ;-) Oba wollt mr auf d Turm von dr Schtadtmauer, abr dr Turmherr hat uns im Räga schteha lassa. Dr Jürgen hat amol klingelt, abr s hat koinr uffgmacht. Wenn i oimol nach Biberach komm, no lässt där mi drausa... No hat uns dr Jürgen no von net ganz so weit oba zeigt wo mir übrall gwäsa wara. Oschliessnd gings a weng d Berg nuntr und mir warat scho wiedr in dr Dollinger-Residenz. Dr Jürgen hat no an Äfflesvideo in d Rekordr und a paar Maultascha in d Pfann gschmissa. Braucht hett i eigntlich nix meh zum Ässa, abr wenns halt schmeckt. Dr Marco hat uff s Ässa vrzichtet, no henn halt mir andre a weng meh ghett. Zum Abschluß hat dr Jürgen no ausm Großmuttrbuch (Buch zur TeVau-Sendung) gläsa. Und weilen des so gfreit hat dass dr Marco und i do warat, hatr uns no a paar Schäumla als Wägzährung mitgäbba. (Meine Ässa näbe dem wie i grad die Seit dhanna mach.) Ja was solle jetzt no schreiba, so um halb Achte rum sinn mr no ganga. I hann d Marco bei seim Auto, wenn mr des no als Auto bezeichna ko, abgsetzt und bin halt amol losgfahra. Uff dr Schnellschtroß hat mi dr Marco no übrholt und i bin no bis kurz vor Ulm hintrm her gfahra. Dr Rescht isch schnell vrzehlt. Ellwanga von dr Siebanr runtr, quer nübr nach Hall, Auto um dreiviertl Zehne parkt, was trunka und dr dag war rum. So, und jetzt kommat d Bildr:  Hinter dem Haus genau in dr Mitte isch Biberach. 170 Kilometr weitr halt.  Des isch dr Schtäcka (Rebstock) von vorna.  Do hocka dr Marco, Chrischtiane und dr Jürgen.  Des halt i für Ohgäberei mit so nr teira Kamera zu fotografiera. Obwohl... I hann die gleich.  I sag nur: Born to be dr wild Jürgen.  Hintr därra Hecka sinn mr gockt.  Leidr isch des nix rechts gworda. eigntlich sollt mr do jetzt an Esel rkenna. Die Gschicht dzu hat dr Wieland gschrieba, do gings drum ob mr von am gmietete Esel au d Schatta mitnutza derf, odr net.  Des Haus passt gar net do nei. Also vom Bauschtiel her. Drumrum sinn Häusr die dürfta gut Hundrt bis Zwoihundrt Johr Ältr sei. Des im Vordrgrund soll dr Markt sei.  In därra Kirch von dem Turm wara mr schpätr drin. Der Turm isch an ganz gutr Ohaltspunkt, weil mrn oifach von fascht übrall her sieht.  Lila Blumakohl! Und des Bild isch net nochträglich eigfärbt worda. Also i koh mr net helfa, abr des halt i für an granadamäsiga Schwachsinn.  D Chrischtiane beim Kartoffl schnitzla. Und m Marco isch a Licht uffganga ;-)  Mit viel Müh und noch mehr Liebe legt dr Jürgen sei Backblech mit Teig aus.  Marco beim schöpfa, leidr uhscharf.  Des isch jetzt a komplett belegtes Blech bevors in d Ofa kommt. Wenn mr genau noguckt, no kann mr im Ofa des andre Blech säha.  Fertige Dennet. Do läuft mr s Wassr in dr Gosch zamm.  Dr Jürgen teschtet, obr no in des weiße Auto eischteiga koh. Des linke ischm Marco seins. Also mr merkt scho das dr Marco mit Parkplätz ganz schparsam umgeht.  Des isch dr neu Ohglegte Teil vom Ratzagraba. Sieht beschtimmt schee aus wenns amol ganz fertig isch.  Wenn i a Haus in därra Farb streich, no dürft ihr mir alle amol an Tritt in d Hintrn gäbba. Des isch doch grausam und vrschtöhßt gega d Genfr Konventiona. Und zwar der Teil wo d Foltr vrbota isch.  In dem Häusle isch dr Wieland ghockt und hat dichtet und die Schtück vom Schäkspier übrsetzt. A bissle Garta isch no do um des Gartahäusle, abr nimme viel. Näbe dro isch dr Bürgrpark.  Der blaue Schtreifa hintr d Äffle isch n Brunna. Des gelbe Gebimmsl dnäba isch... Soll wohl Kunscht sei.  So amol a Bild von mir. Hinta isch no a Denkmal von... Koi Ohnung, hanne scho wiedr vrgässa. Des ganze isch jetzt au im Hof von dem (gschlossana) Museum.  Scheenr Altar. Leidr isch dr Blitz net weit gnug hintr ganga.  Scheene Orgl.  Dr Jürgen und dr Marco falla fascht nach hinta um ;-).  Des isch des älteschte Haus von Biberach. So um Dreizehnhundrtirgndwas rum.  Marco, Chrischtiane und dr Jürgen.  Also i hät nie denkt, dass mr mit sowas au a Firma gründa ko. Eigntlich sinn Schwoba ja gwaltlose Menscha, abr s scheint au Ausnohma z gäbba.  Kessl in dr Brauerei. Hat abr net so ausgsäha als ob die do grad gschafft hätta.  Des isch dr Garta von dr Dollinger-Residenz.  Dr Jürgen hat no a paar Schnecka ausm Gwächshaus gjagt ;-)  Es war einmal... Zum Abschluß gabs no a Läsung vom Onkl Jürgen. In därra blaua Dos uff dem Schränkle mit dr offana Tür, genau im Eck, do sinn die Schäumla drin. Jetzt mußr sich a neues Vrschteck sucha ;-) Zrück zur Hoimatseita |