Pünktlich om elfe semmer do gwä, ond scho mol die zwoi Holzfigure (sieht ma weiter onda auf em Bredlesbild) mit em Pferdle aus der Vogelherdhehle bekannt gmacht. Dees Pferdle isch aus Mammutelfebein gschnitzt ond oins von de erschte Zeugnisse menschlicher Kunscht. Do hengt a Bild drvo en dr Wirtschaft. Weil mir aber no mit Film photographiered ka dees no a guets Weile daure bis do Bildle drvo gibt.

Glei hemmer au de richtige Disch gfonda, « 12:00 Uhr Haschka» isch auf em Schildle gschtande. Weil mir hend drausse Gens ond Enta schprenge säh, hemmer ons au glei noch onserer Gans erkundigt. Die sei scho em Solarium hots ghoiße.

Kurz vor halber 12 isch no es Eile ond der Graf eidroffe. Kurz drauf dr Marco. Der isch ganz mit Elan drherkomme ond sein Schirm hot wie Spazierstock ausgsäh von der Ferne, sodaß en schier ed kennt hett.

Es Eile hot onsere zwoi Freind en Plüsch drbeighet, mit ma scheena Schildle dra. Es Äffle hot em Aschebecher Platz gnomme, mir rauched jo älle ned ond sonsch wär er omgfalle.

Dr Manne Nord, der jo am gleiche Dag sei Geburtstagsjubiläum feiert wie onser Grupp, hot en Jagdhond mitbrocht. Die Dame hoißt Gisi.

Wo mir also alle versammlt wared, hemmer ons no omgsetzt weil dr Marco, es Eile, dr Jürgen ond d Christiane hend a Gans griegt. Dr Graf ond dr Manne hen d Schbeiskart griegt. Ond no isch auftrage worde. Dees isch die nemme ganz vollstendig Gans, dr Marco wo grad es Gegephoto macht, d Hefeknepf, Spätzle, Blaukraut ond Soß:

Es richtige Werkzeig hots au drzu gebe. Em Eifer des Gefechts isch es Äffle em Hendergrond omgfalle:

Em Marco sei Viertels Gans (wahrscheinlich es erwähnte Gegephoto):

Oheimlich fett isch so a Gans, i hans ned so recht glaube welle vorher. Aber a schee knusprige Haut hots ghet. An dem Obend han i jedenfalls koi Obendesse meh braucht, dees isch, wenn iberhaupt, scho lang nemme vorkomme.

Dr Manne hot en Schweinebrote bschtellt, ond dr Graf a Lamm. Auf der lenke Seit sieht ma no de Salat wo dr Marco ned gesse hot. D Christiane hot sich später no gopfert.

Es Eile hot fir jeden a Päckle Bretla mitbrocht. Vanillekipferl, Nußheifele, ond extra guete Eliselebkucha. Es Äffle ond es Pferdle vom Jürgen hemmer drzugstellt. Der hot die zwoi vom «Christl», nem Bekannte von dr Uni, gschenkt griegt der se bei seiner Schweschter grettet hot. Lenks sieht ma no die Reschte von der Gans, wo mir ons hen mit Alufolie eipacke lau. A Schnäpsle (rechts) hemmer noch dem Esse guet brauche kenne.

Em Nachhinein muaß ma sage, daß mir hettet au zu sechst von dere Gans esse kenne. No wäred au no a baar meh Hefeknepf neigange mir hette nix eipacke misse ond preislich war die Gans zu viert au ned grad billich, de ganz hot 82 Eiro koscht.

Auf jeden Fall war jetzt en Spaziergang agsagt, oder alternativ a Schläfle. Mir send erscht mol ens Auto gschtiege ond der Graf isch em Marco iber d Schleichwegle gfolgt zur Vogelherdhehle. Die hemmer zeresch mol aguckt. Dr Graf hot sich trotz Probleme mit seinere Hifte wacker ghalte.

Die wo ned hen fahre misse hend sich z Fuaß auf de Rickweg gmacht. Durchs Lonetal semmer glaufe, aber die Lone hot gar koi Wasser ghet!

Aschließend semmer wieder en dr Lindenau ghockt. Dr Graf ond dr Marco hend do auf ons gwartet. Dr Graf hot no misse a Woize fir de Manne 3 mitdrenka, weil der isch verhindert gwä ond hot dees per E-mail so beatragt. Dr Marco hot Wert drauf glegt, daß er koin Kakao sondern en Kaba drenke dät.

Dees isch onser Abschiedsbild. Es war scho recht donkel ond em Marco sei Blitz ned arg hell. Drfir hot er en Selbschtausleser.