Am 11. Juli em letschte Johr vor dr tausender nomsprengt hot ma sich beim Eile en Heubach droffe. Fir alle wo's id wissed: Es Eile isch d'Maria Horlacher die Mutter mit Internetanschluß. I ben mit dem Marco zsamme dr erschte gwä. Dr Marco isch nemlich gfahre ond der kennt sich aus weil der scho mol beim Eile gwä isch.

Noch ma kloine Veschper han i erscht mol misse die Linuxkischt vom Eile agucke. Dodrbei han i feschtgschtellt, daß es en neie xaff gibt.

xaff -horsele -hemd red -acc
und scho hoppelt der Gaul iber da Bildschirm.

Wo dr Günter komme isch hots de erschte Bildle gebe (von dem Glasbruch verzehl i mol lieber nix):
Do sieht ma wie i mit em Eile d'Brotkartoffel uff Vordermann breng ond s'Eile hot letschte Hand an d'Kuttle glegt.

Dr siidliche Manne langed zue. Auf dr Seit dr Marco ond dr Holger.

Noch de Kuttle hots Mauldasche ond Kartoffelsalat gebe. Dr Aeffles Rainer schepft grad lenks en dr Midde hockt dr Hartters Wolfe ond der wo sich so gierig iber de Disch loinet des ben i. Dr Marco isch scho am Esse.
Dr Marco hot en oigene Kartoffelsalat kriegt net mit Nutella aber drfir ohne die Girkle ond ohne Schnittlauch, weil dees isch jo grea.

Onser Gaschtgeberin. Es Eile aka Maria aka Paula von Stauffen gell die hot viel Name ond no meh zom Esse ...
Dr Rolfeisen wo jo eigentlich Rolf Eisenmann hoißt, aber er isch halt beim AOL. Mit drbei dr siiidliche Manne. Siiidlich? Jo! Weil mir send grad mitte em Esse gsesse no isch dr nördliche Manne komme:
D'Stube von dr andere Seit ond dr Hartter's Wolfgang mitte dren. No hot ons es Eile de verschbrochene Bollehuad zoigt. Dees Deng isch richtig schwer ond aus Gibs. Dr Ma vom Eile dr Paul von Stauffen aka Rudi Horlacher Elektromeischder i.R. Noch em Esse wo dr Ranze gschpannt hot isch ma drausse auf dr Veranda gschtande. Dr Raucher hen ganz dringend misse ond dr Reschd isch henterher.
Dr Rudi hot ons sei Hochspannungsappratur zoigt ond es Gardehäusle wo eigentlich Watschelhaus hoißt.


Do hen mr amol de Fischer Günther wo sonscht emmer hender dr Kamera gschdande isch em Bild. Dr hot mir au die Bildle gschickt.
Dr Holger hot sei Ive drbei ghet, fir en Hond recht nett ond brav wenn grad koi Katz en dr Nähe isch. Em Vordergrond de zwoit Hochspannongsalag vom Rudi wo aber en a normale 220V Lamp verwandlet isch.

Oms Haus rom gohts Drebb nab zur Schildkröt vom Ulli. Die hot grad e Stickle Banane ond en Spitzwegerich verdruckt, aber den ißt se blos wenn man ihre brockt aber no leßt se sogar d Banan liege.

Es Eile hot nomol de Bollehuat vorgfiehrt.
No hots scho wieder en Kaffe gebe reschpektive en Tee. Fir de Marco mit Honig, ond d'Weibeer hot er au aus em Zopfbrot rausklaubet. Henderm Rolf isch en netter Hase-Kalender von dr Beate gmolet die wo d'Freindin vom Ulli isch. Außerdem sieht ma die hochtechnisch Funkuhr!

No derf i mi zom Schluß no em Wolfgang aschließe wo schreibt:
Eile ond Rudi,
i glaub, i ka em Name vo aelle schwaedsa, die mo gersch bei Uich warad:

a herzlichs Daangschee fir an rondom scheena Middag.

Zrick zur Ibersich von de Aeffles-Dreffe.